Cerita Bahasa Bali

Subscribe

NGUKUP

I Putu Supartika

Jaum jame sane lantang nujuang angka roras. Jaum jame sane bawak nujuang ang­ka kutus. Matan aine sampun masunar galang saking duur gununge ba dangin. Wayan Krata bangun kisah-kisah sak­ing pasareane. Krasak-krisik ngebitang saput. Negak nguadang bancang sambil muaban. Saput sane anggena nyaputin awakne sawireh petenge dingin kadagelang kemanten ring duur balene. Galeng tur seprai kantun samben ring kamarne, nanging ipun nenten rungu. Ipun pesu saking kamarne laut ngojog kamar mandi tur masugi., Usan masugi ipun negak ring bataran umahne. "Man, ken kopine?" "Nden Beli, antiang malu kesep, ne nu nyeduh malu." Lantas uli paonne pesu Nyoman Rini makta nare madaging kopi a gelas lan ubi makuskus sane andusne kantun ngudus. "Neh Beli kopine." Wayan Krata nyemak ko­pine punika lantas siupa. Ipun nimbal ngambil ubi makuskus sane andusne kantun ngu­dus. Nyegut ubi nyiup kopi kadi bos gede Wayan Krata idupne mangkin. Usan ngopi, gelas sane kantun madaging genekan kopi kalaina ring batarane. "Man, Beli lakar pesu malu. Nyanan umbahin jep gelas kopine," kadi pembantu, kure­nane kaprentah ngumbah gelas kopinne. "Umbah ja malu kesep Beli, nyen lakar dampingin ditu!" "Tundenang lamun ento dogen sing nyak Nyai, sing nawang kurenan sibuk jani," Wayan Krata masaut ngambres teken kurenane. "Nah Beli depin dogen malu ditu, bin jep tiang nyemak." Ngenjit roko akatih, nyetater motor raris Wayan Krata magedi ngojog sik padagangane Nengah Bojolan. Teked drika ipun negak duur bangkune sambilanga ngisep roko.

"Kuda pesu nomere jani Ngah?" "05 Yan, yen ane empat angkane 2505." "Mih jeg sing taen ngukup uli pidan masang nomer. Apa kone ane kuangan nenenan? Nuutang ipian suba. Koda alam suba bakat tuutang. Jeg pragat sing taen ngukup," Wayan Krata mantigang rokone ka tanahe lantas kaenjek kantos apin rokone mati. "Sabar gen Yan, mirib onden rejeki. Nyen nawang mani liu­nan maan ngukup." "Apa? Sabar? Suba uli pidan Cang setata sabar Ngah, sakewala neked jani jeg sing taen menang." "Eda ento sangetanga. Nyanan di banjare ada tajen, Wayan sing kemu?" "Nengah aengken tusing nawang cang, dija ada tajen lakar kepung. Eda ja di desa dini. Di luar desa ada tajen lakar kepung Ngah." Mara leb munyinipune, ipun sampun nyetater motor tur macuet nuju ka umahne. Neked di jumahne ipun mukak baju tur kadagelang ring batarane. Ipun ngojog ka durin umahne nyemak siap kurungan. Ipun madue kurungan siap kutus ukud. Wenten siap putih kedas, biing kuning, brumbun, klawu, sangkur duang ukud, putih kuning, ijo gading, Ian siap biing kedas. Paling Wayan Krata ngayahin siap kurungane punika. Nyemakang yeh. Ngemaang jagung lan balang. "Iba biing kuning, jani suba gantine iba nulungin kai. Nyanan iba lakar tohin kai ditu di kalangane. Eda pesan iba ngaenang kai kuciwa." Siap biing kuning punika makruyuk, laut katimbalin siape sane lianan. Lega kenehne Wayan Krata sawireh siapne makruyuk. Manut papinehipune, yen siape kone kantun makruyuk ri kala lakar julukanga, punika penanda siape nenten jajerih lan sampun siap jagi maadu ring kalangan tajene.

Nenten karasa galahe majalan, sagetan sampun  jam dua. Nyingakin matan jame sampun jam dua, Wayan Krata magegesonan nyemak krepe. Mesuang i biing kuning uling guungane tur wadahina krepe. "Man, ken pipise Beli lakar  kemu ka banjar ngetohin i biing kuning. Baang Beli bekel Man." "Tiang tusing ngelah pipis Beli. Pipise tuah masisa anggon meli baas jakan anggon buin mani dogenan Beli." "Nah to suba silih malu Man. Yen i biing kuning menang lakar

uliang makejang Man." "Eda pipise ento anggona Beli,  mani apa anggon meli baas jakan?"

"Aruuuuhhhhhhh, Nyai bes lebihan itungan. Ane mani, mani dogen urusang. Eda ento urusa malu. Ne penting jani Beli maan bekel kemu ka banjar anggon ngetohin i biing kuning malu Man." Kurenane Wayan Krata nenten bani mamunyi napi malih. Wayan  Krata ngojog ka kamarne tur nye­mak pipis kurenane sane jagi anggena numbas baas jakan benjang. Kendel kenehne Wayan Krata polih jinah jagi kanggen ngetohin i biing kuning. Makamben bawak, mabaju selem ngandong krepe ipun nyetater motor tur ngojog ka banjare  matajen. Sakewala kurenane ring jumahne bengong ngenehang baas jakan sane kaanggen benjang. Dija ipun pacang ngruruh jinah. Yen nyak Wayan Krata menang pastika ipun polih jinah anggen numbas baas jakan. Yen dijelek nasibe Wayan Krata kalah, dija ipun jagi ngruruh jinah anggen numbas baas jakan? Sajabaning nyilih teken sandingane, utawi ngutang ring warung. Kantos mangkin, ipun sampun akeh.ngutang ring sandingane wiadin ring warung. Ring sandingane ipun ngutang jinah. Ring warung ipun ngutang baas, ngutang lakar jukut, gerang, lan soroh dedaran sane lianan. Punika taler Wayan Krata akeh pisan madue utang ring pisaga. Ring warung ipun ngutang roko, ngutang kopi. Lan ring pisaga ipun ngutang jinah sane kaanggen masang nomer, matajen, maceki, lan masepirit. Sawetara jam lima sore, Wayan Krata rauh saking banjare makta krepe kemanten. Nongkrak motor ring gudangne, raris ipun nagelang krepe. "Kalah, kalah jeg begbeg kalah. Bin pidan lakar maan menang?" Wayan Krata ngojog kamarne raris mabahan. Kurenane nenten bani mataken napi-napi. Ipun takut yen kurenane galak tur mamunyi kasar-kasar. Suud mabahan, ipun ngojog ka paon. Di paon munyin piring, munyin gelas mapalu. Ipun uyut padidiana ring paone. Kurenane tuah nyidayang ningalin kemanten tingkahne Wayan Krata punika. Indike puniki majalan sabilang wai. Wayan Krata nyansan memuduh masang nomer, matajen, lan maceki. Utang ring pisaga nyansan ngakehang. Kenten taler utang ring warung masih akeh. Wayan Krata taler nenten taen menang ri kala matajen, maceki utawi masang nomer. Pragat kalah kemanten sane kapuponin olih ipun. Ri kala kurenane ngadol celeng, kurenane polih madepan aji satu juta limangatus. Mara sudagar celenge magedi, Wayan Krata ngenggalang maakin kurenane. "Man, aji kuda payu celenge ento?" "Payu satu juta limangatus Beli, kar anggon tiang mayah utang di warung lan sik sand­ingane delodan Beli..Lek atine makelo mautang teken pisagane. Sisane mara lakar ang­gon baas jakan." "Utang dadi durian bayah Man!"

"Yen bayah durian, dija lakar ali'ang pipis? Bisa-bisa utange sing lakar mabayah, tur ngliunang dadine Beli." "Kene suba dadi anak kolot! Yen pipise nenenan aba ka dagang nomere, sinah lakar dadi ngliunang. Ia lakar mapanak Man. Yen jani bayah utange iraga ane rugi. Tonden maan ngisiang suba pisagane maluan ngasanin." "Lamun menang, dikalahe lakar kenkenang Beli cara ane suba-suba?" "Nyai lebian munyi, mai aba!" takut ninggalin Wayan Krata galak lan mamisuh, kurenane Wayan Krata polos jeg nyerahang jinahe punika makejang teken kurenane. "Eda onyanga Beli, apang ada anggon meli baas lan lakar jukut buin mani." "Neh kanggoang Nyai ngaba tanggune limangatus ang­gon "baas jakan. Eda liu-liu Nyai ngaba pipis awak tuara nawang apa." Polih jinah akeh, Wayan Krata lantas magedi ngojog warungne Nengah Bojolan. "Ngah, 8778 satu juta alih cang jani!" "Kuda Yan, satu juta? Wanen gati cai, dija maan pipis?" "Ne mara maan pipis ulian ngadep celeng." "Pantes. Men to dija maan nomer 8778?" "Ibi sanja cang ngipi kepung anak buduh Ngah. 87 ento laut balikang cang tur dadi 8778." Mara ipun mesuang pipis uli kantongne, sagetan teka Komang Bentir mrika ka war­ungne Nengah Bojolan ngalih nomer.

"Meli nomer nyidaang kanti satu juta, mayah utang sing nyidaang!" Komang Bentir mamunyi sinis di sampingne Wayan Krata. Ningeh munyine Komang Bentir buka keto, jeg jelek kliab muane Wayan Krata. Raris nenten mamunyi napi, ipun jeg ngenjuang pipise sane satu juta teken Komang Bentir lan ipun laut maklieng mulihne. "Buung meli nomer, payu ang­gon mayah utang pipise," Wayan Krata mamunyi ngrumuk teken kurenane neked di jumahne. "Nah, melahan ya keto dari pada makutang anggon meli nomer." Buin telune, semeng sawetara jam 9 Wayan Krata nganggur sik Nengah Bojolane. Usan nongkrak motor ipun negak di duur bangkune sambilanga menekang batis. 'Yan, nomer ane orahang cai itelun tembus empat angka. Adi belog cai buung meli nomer dugas ento? Yen saja cai payu meli nomer satu juta jeg sugih jani cai Yan." "Apa? Ane 8778 ento ngu­kup?" "Ae Yan! Kenapa?" Jeg ngenggalang ipun mac­uet mulihne nenten ja ma­munyi napi tekening Nengah Bojolan. Neked di jumahne ipun negak di bataran umahne masadah di temboke. "Hahahaha.... Awake jani suba dadi anak sugih Man apa katagih Nyai jani lakar beliang Beli. Umah mewah, mobil baru, mas, gelang, kalung lakar isinin hahahaha.... Beli ngukup man, Beli ngukup, Beli dadi anak sugih jani. Nomere ngu­kup empat angka, hahahaha... Utange di pisaga jeg lunasin suba jani...." Kurenane Wayan Krata bengong ninggalin Wayan Krata. Yeh paninggalane membah melusin pipinipune.